LAOAG CITY – Pinaigetan ti Philippine Red Cross (PRC) ken Department of Education (DepEd) ti pannakikoordinarda tapno papigsaen ti adal iti disaster preparedness ken ilungalong ti volunteerism kadagiti agtutubo iti tengnga dagiti pangta ti kalamidad kas ti El Niño.
Nakapukos ti nadakamat a kolaborasion iti panangpapigsa dagiti Red Cross Youth (RCY) club kadagiti pagadalan iti babaen ti panagsanay iti first aid, cardiopulmonary resuscitation (CPR) ken disaster risk reduction and management, pakairamanan payen ti mental health awareness.
Inpaganetget ni Philippine Red Cross Chairman ken Chief Executive Officer Richards Gordon a gagem ti addang nga agaramid dagiti estudiante a saan laeng a nakasagana a mangsalaknib ti biag no di ket boluntario a mangpataripato ti kinatalged ken pakabuklan a kinaimbag ti pada a tao.
Inbatad met ni Education Secretary Sonny Angara ti kinapateg ti panagdur-as dagiti intero ken responsable nga umili, partikular iti panawen ti Artificial Intelligence no sadinno masapul nga isubli ti human touch ken kultura ti panagtulong iti komunidad.
Malaksid iti daytoy, inpetteng ni Philippine Red Cross Secretary-General Dr. Gwendolyn Pang a napateg ti papel ti Red Cross Youth tapno maipasa dagiti humanitarian values ken maipaayan dagiti agtutubo ti gundaway a sanayen ti leadership skills-da.
Pormal a patibkeren ti Philippine Red Cross ken Department of Education daytoy nga alyansa iti babaen ti panagpirma iti maysa a Memorandum of Agreement (MOA) para iti agtultuloy a kooperasion ken seguridad kadagiti pagadalan iti intero a pagilian.
