Inpaganetget ni Mrs. Marnelli Sabas iti City Social Welfare and Development Office (CSWDO) iti siudad ti Batac ti kinapateg ti panangrespeto ti pada a tao ken panagkiddaw ti tulong no makapaspasar ti maysa nga indibidual wenno estudiante ti panagbully.
Daytoy ket kagiddan ti nalapdan a maipagarop a plano a mass shooting a maisayangkat koma iti maysa pagadalan iti nasao a siudad babaen kadagiti tallo a menor de edad a ti prime subject ket makapaspasar ti panangbully manipod kadagiti kaadalan na.
Rumrumuar gapu iti pannakabul-bully ti prime subject ket maipagarop a kayatna ti mangisayangkat nga umuna ti mass shooting sakbay nga agpakamatay daytoy.
Kabayatanna, binalakadan ni Sabas dagiti estudiante a makapaspasar ti bullying a saan da a pabasulen ti bukod da a bagi no di ket patibkeren ti pakinakem a mangiyuman kadagiti nagannak, mangisursuro ken dadduma pay a mapagtalkan a tao.
Inbatad na pay a napintas a masursuro ti mangisalakan iti bukod a bagi babaen iti legal a wagas, saan ketdi nga agibales, ken pilyen dagiti pagayam nga ammo na ti mangipateg ti padana a tao
Nagballaag met ni Sabas kadagiti estudiante nga agbulbully wenn aguy-uyaw iti padana a tao a nasken a masursuro nga admitiren ti nagbidutan, ammo ti agpadispensar ken baliwan ti saan a nasayaat nga ugali.
Inpetteng pay ni Sabas a saan a rumbeng a tagibassiten ti pada a tao ken saan koma a pagragsakan iti panaguyaw kadakuada.
Innayun na a ti pannakaawat ken panagrespeto iti pada a tao ket isu ti tulbek tapno maliklikan ti bullying ken mapagtalinaed ti kinatalged ken seguridad kadagiti pagadalan.












