LAOAG CITY – Inpasigurado ni Senator JV Ejercito ti saan a pannakausar ti nailungalong a 2027 national budget para iti impeachment trial kontra ken ni Vice President Sara Duterte.
Naglikudan ni Ejercito, mangidadaulo iti Senate Committee on Finance, ti alegasion ti bise presidente a mabalin nga aramaten ti gobierno ti pondo para iti panagpulitika ken tapno magutigot dagiti agpanpanday linteg a pumabor iti conviction iti impeachment trial.
Immuna iti daytoy, kwinestionaran ni Duterte ti pannakausar ti 2027 national budget iti maipagarup a panangibunong ti kuarta pakaseknan iti impeachment proceedings.
Iti baet daytoy, namnamaen ni Ejercito a saan a makwestionaran ti agbalin a desision dagiti senador nga agserserbi kas senator-judges iti manarimaan nga impeachment trial.
Inbatadna nga adu dagiti karit a masapol a solusionan ti gobierno, ngem paset iti pagrebbengan dagiti senador ti panangipatungpalda ti konstitusional a responsibilidad iti impeachment proceedings.
Inpettengna a saanda nga ipalubos a mausar ti budget ti pagilian para iti daytoy a banag.
Kunana a kas mangidaulo iti Senate finance committee, pagrebbenganna a siguradoen a mausar ti pondo para kadagiti nakaikeddenganna a proyekto.
