LAOAG CITY – Nagwarasen iti maika-walo a probinsia ti Ebola outbreak idiay Democratic Republic of Conggo.
Basar iti public health institute ti Congo, nairekord ti outbreak ti Ebola idiay North Ubangi.
Kinumpirmaran ti National Institute for Biomedical Research ti dua a baro a kaso, pakairamanan ti maysa a natay iti nasao a probinsia.
Kabayatanna, ti North Ubangi ti maika-walo a probinsia a naapektaran ti nasao nga outbreak, pakairaman ti North Kivu, Ituri, Haut-Uele, Tshopo, Sud-Kivu, Bas-Uele ken iti South Ubangi.
Iti kamaudian a report, nairekord ti 67 a baro a kaso ti Ebola idiay Congo, no sadinno 27 manipud kadagitoy ti natay kalpasan laeng ti 24 nga oras.
