LAOAG CITY – Gimmatang ti lokal a gobierno ti siudad ti Laoag kadagiti baro a heavy equipment a mausar para iti road clearing ken dagiti dadduma pay a proyekto ti siudad.
Segun ken ni Laoag City Mayor James Bryan Alcid, karaman kadagiti baro nga equipment ti road grader ken bulldozers a na-procure idi napalabas a bulan.
Kinuna ti Mayor a dakkel ti maitulong dagitoy a makinarya, nangruna iti panagdalus ken pananglukat kadagiti kalsada kadagiti tunggal barangay.
Babaen kadagitoy, saanen a masapul a kanayon nga agkiddaw ti siudad ti tulong manipud kadagiti pribado a kompania tapno maaramid dagiti kasapulan a road clearing operation.
Inlawlawag met ni Mayor Alcid a mausar ti bulldozer iti nagduduma a trabaho, ngem ti kangrunaan a prioridadna ket ti sanitary landfill ti siudad.
Kinuna pay ti Mayor a kasapulan ti bulldozer gapu ta ti dati nga equipment ket saandan a maususar.
Kabayatanna, inpakaammo ni Mayor Alcid nga aggatad iti agarup ₱4M agingga ₱5 million ti road grader, kabayatan a ti bulldozer ket aggatad iti sumurok ₱5 million.
