LAOAG CITY – Nangipila ni Senator Risa Hontiveros ti Senate Resolution No. 746 nga agkidkiddaw ken ni Presidente Ferdinand Marcos Jr. nga ideklerar a persona non grata ni Chinese Ambassador Jing Quan wenno kiddawen iti gobierno ti China ti panangisubli iti nadakamat a diplomat.
Nakabasar ti resolusion iti rakurak ni Jing Quan a nalaka a mangabak ti China no adda man panagdidinnanggar iti baet ti China ken Pilipinas, pakairamanan payen ti panagtignay ti China iti West Philippine Sea.
Dinakamat pay iti resolusion ti pakdaar ti Chinese Embassy a possible a pawilan dagiti opisial ti Pilipinas a makastrek iti China no ideklerar a persona non grata ti embahador.
Ti persona non grata ket ti panangibilang iti maysa a diplomat kas saan a maikari iti pagilian a serserbianna, a posible a mangitunda ti panangpatalaw wenno panangtalaw daytoy iti pagilian.
