LAOAG CITY -Nangipila ti resolusion dagiti sangapulo a miembro ti Kamara de representantes tapno gutigoten ni Presidente Ferdinand Marcos Jr. nga ideklarar a persona non grata ni Chinese Ambassador Jing Quan.
Iti House Resolution No. 1562, inbatad dagiti agpanpanday linteg a masapol nga agtignay ti Presidente mainaig iti nagsasaruno a rakurak ni Jing a maipagarup a pangpangtaan na ti seguridad ti Pilipinas.
Karaman kadagiti nadakamat a rason ti pannakaipila ti nasao a resolusion ket ti nagbalin a rakurak ni Jing iti Diliman Dialogues a nalaka laeng a mangabak ti China no agusar daytoy ti pwersa kontra iti Pilipinas.
Nupay kasta, kunana metlaeng a saan nga aramiden daytoy ti China gapu ta kalikagum ti Beijing ti natalna nga aglawlaw.
Kalpasan iti daytoy, nakaala ti nasao a rakurak ni Quan ti adu a reaksion manipud kadagiti sumagmamano nga opisial ti gobierno, no sadinno nga ibilang daytoy ti Department of Foreign Affairs a panagpangta kontra iti Pilipinas.
Mainaig iti daytoy, karaman kadagiti nangipila iti nasao a resolusion ket isuda Reps. Ziaur-Rahman Alonto Adiong ti Lanao del Sur 1st District; Adrian Michael Amatong ti Zamboanga del Norte 3rd District; Kaka Bag-ao ti Dinagat Islands; Percival Cendaña ti Akbayan Party-list; Leila de Lima ti Mamamayang Liberal Party-list; Chel Diokno ti Dadah Kiram Ismula ti Akbayan Party-list; Cielo Krisel Lagman ti Albay 1st District; Karl Fernandez Legazpi ti PINOY WORKERS Party-list; ken ni Mark Anthony Santos ti Las Piñas.
