Manarimaan ti panagsagsagana ti Bureau of Fire Protection ditoy siudad ti Laoag para iti Undas 2026.
Inbatad ni acting City Fire Marshal Senior Fire Investigator Edison Reyes ditoy siudad a nakaaramiddan ti contingency plan-da manipud pay laeng idi napalabas a lawas.
Mainaig iti daytoy, nakikinnammayet da kadagiti kameng ti Community Disaster Risk Reduction Management, Philippine National Police ditoy siudad, Department of Public Safety (DPS), City Health Office (CHO), ken ti Philippine Coastguard iti siudad ken dagiti dadduma pay nga ahensia.
Basar ken ni Senior Fire Investigator Reyes a kalpasan ti panagtataripnongda, kadua dagiti agduduma nga ahensia ti siudad ket addan dagiti naiplastar a deployment area kadagiti sumagmamano nga ahensia gapu ta makitada a ti siudad ket maysa a kaadoan ken kalawaan ti kampo santo.
Inpakaammona a mangrugi inton sumaruno a Sabado ken Domingo ket agi-deploy-dan ti fire trucks tapno naalalisto ti panagrespondeda no man adda madi a mapasamak kabayatan ti panagturong dagiti umili iti kampo santo.
Malaksid iti daytoy, manamnama nga addan to dagiti fire officers a mai-deploy kadagiti kampo santo ket uray dagiti naka-day-off ket kasapulan a sumrek ken agbantay kadagiti lugar a pagturonganda.
Iti agdama, namnamaen ti Acting City Fire Marshal iti natalged a panagbisita ken pananglagip dagiti umili kadagiti pamiliada a pimmusayen.
