Inpasingked ni Jail Inspector Sheila Marie D. Sapaden, Acting City Jail Warden ti Bureau of Jail Management and Penology (BJMP) ditoy ciudad ti Laoag, nga awan dagiti agsasakit kadagiti Person Deprived of Liberty (PDL) iti baet ti mapaspasaran a kinabarati panawen nga epekto ti El Niño.
Segun kenkuana, adda dagiti isaysayangkat da nga aktibidad babaen iti Oplan El Niño kas paset ti panagsagana ti Bureau of Jail Management and Penology tapno maalay-ayan ti epekto ti nakaro a kinabara ti panawen.
Kuna na a maysa kadagiti ar-aramiden dagiti wardens iti agdama ket ti pannakikoordinar kadagiti nagduduma nga ahensia kas ti Bureau of Fire Protection (BFP), Ilocos Norte Water District ken dagiti supplier ti mineral water tapno masigurado ti suplay ti danum iti pasilidad.
Innayon na a dagiti nadakamat nga ahensia ti kangrunaan a makatulong kadakuada, aglalo ti maipanggep iti suplay ti danom.
