Pinatalaw ti Philippine Coast Guard (PCG) ti maysa a ganganaet a barko a nakita iti uneg ti 12-nautical-mile territorial sea ti Pag-asa Island iti Kalayaan Group idi kalman Oktubre 25.
Basar iti Philippine Coast Guard (PCG), nakita ti barko nga adda iti 2.7 nautical miles iti laud ti isla, asideg iti Sandy Cay.
Insigida daytoy a binallaagan ken sinaruno ti maysa a response boat agingga makaruar iti nadakamat a kabaybayan.
Kabayatanna, nakita met iti lugar ti China Coast Guard Vessel 21581 ken dua a rubber boat-na daytoy nga agbanbantay iti operasion ngem naituloy daytoy nga awan ti aberia.
Inpakaammo ti Philippine Coast Guard, daytoyen ti maikapito nga operasionna iti uneg ti agarup uppat a lawas kontra kadagiti ganganaet a barko iti Kalayaan Island Group.
Kabayatanna, inpasigurado ti ahensia a papigsaen pay ti panagbantay ken panangpatrolya tapno maprotehiran ti karbengan ti Pilipinas iti kabaybayan.
