Inbatad ni Dr. Alan Taylan, Internal Medicine iti St. Camillus De Lellos Hospital ditoy ciudad ti Laoag, nga ado dagiti risgo para iti salun-at ti pannangan kadagiti atang.
Kuna na a saan a ti maibagbaga panagdiwig ti maysa a tao no mangan ti atang no di ket ti possible a panagpasar na ti nagduduma a sakit gapu kadagiti bakterya a mailaok kadagiti makan a nabaybay-an iti ruwar.
Segun kenkuana, karaman kadagiti sakit a possible a mapasaran iti pannangan ti atang wenno dagiti taraon a mabaybay-an iti ruwar ket ti bacterial infection, acute food poisoning, kontaminasyon gapu ta saan a maliklikan nga adda dagiti agdisso nga insekto wenno pagdalanan dagiti bao wenno ipes.
Nagballaag ni Dr. Taylan nga iti kada 20 a minutos ket manaynayunan ti mikrobyo nga adda iti atang isut gapuna a saan a rebbeng a kanen pay dagitoy kalpasan a maidasar.
Mainaig iti daytoy, inbalakad ni Dr. Taylan a liklikan met ti agluto wenno agisagana ti ado a taraon aglalo iti nabara a panawen gapu ta alisto a mabangles ken saan a rumbeng nga ipapudot pay dagitoy gapu ta dakdakkel manen ti risgo na iti salun-at.
