Naglikudan ni Senador Panfilo “Ping” Lacson nga inranta nga inkeddeng ti P50-M a gunguna ken ultimatum iti panagsuko ken ni Senador Ronald “Bato” dela Rosa tapno malappedan daytoy a makabotos iti impeachment trial ni Vice President Sara Duterte.
Segun ken ni Lacson, sayangguseng laeng dagiti alegasion a gagem ti addang ti gobierno a maapektaran ti panagbotos iti impeachment case kontra iti bise presidente.
Inlawlawag ni Lacson nga iti agdama ken saan a sakup ti turay a mangipatungpal ti puersa a panag-atendar ti impeachment court ni dela Rosa, basar iti immuna a desision ti impeachment court mainaig iti banag ti kasapulan a botos para iti conviction.
Iti babaen ti nadakamat a desision, ti 2/3 a botos tapno ma-convict ti maysa nga opisial ket maibasar laeng kadagiti senador a legal ken aktual a posible a makipaset iti panangusig. Saan a karaman iti bilang dagiti saan a makaatendar gapu kadagiti situasion kas ti panaglimmeng kadagiti otoridad ken saan a maitudo ti ayanna.
Iti agdama, aglemlemmeng ni dela Rosa kalpasan ti maireport nga adda warrant of arrest kontra kenkuana manipud iti International Criminal Court (ICC) mainaig ti kampania kontra droga idi administrasion ni dati a Presidente Rodrigo Duterte.
Inbatad ni Lacson a narigat para ken ni dela Rosa a makipaset iti impeachment trial wenno agbotos a saan nga adda iti peggad a matiliw.
Dinakamatna ti panagatendar ni dela Rosa iti Senado idi Mayo 11 tapno agbotos para ken ni Senador Peter Cayetano iti panagpili ti Senate President . Nupay kasta, maipagarup a naglibas ni dela Rosa manipud iti Senado kalpasan ti pammaltog iti uneg ti pasdek idi Mayo 13.
Nagballaag ni Lacson a no man agatendar manen daytoy iti Senado tapno laeng agbotos ket ikabkabilna unay ti bagina iti dakkel a peggad.
Kunana a no makipaset ni dela Rosa nga awan ti naiwayat a panangtiliw ket mangitunda daytoy dagiti saludsud mainaig iti kinalaing dagiti otoridad iti panangipatungpal ti lintef.
Maipalagip nga inanunsio ti gobierno ti P50 million a gunguna tapno tiliwen ni dela Rosa kabayatan a naipaayan pay daytoy ti Philippine National Police ti maysa a lawas tanpo sumuko.
Kabayatanna, kwinestionaran met dagiti abogado ti senador ti legalidad ti nadakamat a gunguna.
