Inpakaammo ni Mrs. Perlita Cabello, mangidadaulo ti City Social Welfare and Development Office (CSWDO), nga adda dagiti agtutubo ditoy siudad ti Laoag a manamnama a makaawat ti allowance agingga intono Disiembre ita a tawen.
Kunana a maysa kadagiti rason no apay nga agsardeng wenno ag-drop-out ti maysa nga agad-adal ti panagadal ket gapu iti kinakurang ti allowance pakairamananen ti usaren da a pagplete.
Segun ken ni Cabello, babaen ti programa ti City Government nga Student Assistance for Education Resilience for Learners at Risk of Dropping Out (SAFER LARDOS), maikkan ti allowance dagiti benepisario.
Inbatad na nga adda ti 97 nga estudiante manipud iti elementaria ken sekondaria ti nakaawat ti cash assistance manipud ti gobierno siudad babaen ti City Social Welfare and Development Office (CSWDO), personal a naiyawat kadagiti estudiante kadwada dagiti nagannak wenno guardians-da.
Naamoan a makaawat ti P1,500 dagiti elementaria ken P2,000 met para iti junior high school ken senior high school.
Inpasingkedna ti agtultuloy a suportana ti edukasion ken dagiti agad-adal para ti napinpintas a masakbayan da.
