Nangiwayat ti Ilocos Norte Provincial Explosive K9 Unit ti panag-monitor kadagiti nagduduma a kamposanto ditoy probinsia kas paset ti panagsagana iti Undas 2026.
Segun ken ni Police Senior Master Sergeant Alexis Bringas, natalna ken natalged ti agdama a kasasaad dagiti lugar a nagturonganda, ken awan pay dagiti naimatangan a naibati a bag wenno ramit.
Inlawlawagna a ti kangrunaan a kitkitaenda ket dagiti naibati a ramit a mabalin a mapaguduaan tapno natalna ken natalged ti panagbisita dagiti tattao kadagiti kamposanto.
Malaksid kadagiti kamposanto, nagmonitor da pay kadagiti bus terminal kadua dagiti Philippine Drug Enforcement Agency (PDEA), Highway Patrol Group (HPG) ken Ilocos Norte Police Provincial Office (INPPO).
Inlawlawag ni Bringas a natalged met ti kasasaad dagiti bus terminal a nagturonganda.
Innayonna ti kinapateg ti panagmonitor ken panangkita kadagiti bagahe dagiti agsangpet ditoy probinsia tapno maliklikan ti pannakaiserrek dagiti eksplosibo a banag ken dagiti mabalin a mangpataud ti risgo.
Kabayatanna, agtultuloy ti panag-monitor ti ahensia agingga a malpas ti Undas.
