LAOAG CITY – Nagtalinaed a generally peaceful ti pannakaobserbar ti undas 2026 iti public cemetery iti ili ti Badoc.
Daytoy ti inpakaammo ni PCPT Christopher Pola ti chief of police iti Philippine National Police iti nasao met laeng nga ili.
Inbatadna a basar iti kaudian a panang-monitor-da ket bassiten dagiti agsangpet a bumisita iti nasao a public cemetery iti ili ti Badoc.
Nupay kasta, inpasiguradona nga adda latta dagiti kameng ti Philippine National Police nga agtultuloy a nakabantay iti sementeryo.
Kinunana nga awan ti aniaman a natiliwanda a naglabsing iti linteg trapiko, pakairamanan dagiti saan a nakasuot ti helmet ken ti reflectorized vest.
Innayonna pay nga awan ti aniaman a naaktuaranda a nanggandat a nangiserrek dagiti maipawil a maisserrek kas kadagiti buneng, kumpay, arak ken dagiti dadduma pay a mabalin a makadangran iti sabali a tao.
