Pagtalinaeden ti Philippine National Police (PNP) ti naiget a seguridad kadagiti kangrunaan a terminal ken kalsada iti tengnga ti panagawid ti minillion a biahero kalpasan ti Undas break.
Inbilin ni Philippine National Police Chief General Jose Melencio Nartatez Jr. kadagiti police unit iti intero a pagilian a paigetan ti panangpatrolya kadagiti highway, bus terminal, pantalan ken aeropuerto tapno maliklikan ti krimen ken masigurado ti kinatalged dagiti motorista ken pasahero. Maiyataday daytoy iti direktiba ni Presidente Ferdinand Marcos Jr. iti babaen ni Interior Secretary Jonvic Remulla.
Ginutigot pay ni Nartatez dagiti motorista a sumurot iti linteg ti trapiko, liklikan ti napaspas unay, ken saan nga agmaneho no nakainom ken aginana sakbay agbiahe ti adayo. Kunana nga awan destinasion a masapul nga isagmak ti biag.
Maipalagip a nasurok maysa a million ken 160,000 a tattao ti nagbisita iti dua a kangrunaan a pampubliko a kamposanto iti Manila idi Nobiembre 1 para iti Undas.
Kabayatanna, ginutigot met ti Philippine National Police ti publiko nga agtalinaed a naannad ken responsible agingga makasangpet a natalged iti bukod a destinasion.
