LAOAG CITY – Agkurkurang ti medical supplies ti Laoag City General Hospital (LCGH) gapu iti agtultuloy a panagado dagiti pasiente.
Inadmitir ni Dr. Yolanda Madamba-de Silva, ti officer in-charge ti Laoag City General Hospital (LCGH) nga adda dagiti gundaway nga ibilinda dagiti pasiente da a gumatang ti medical supplies a mausar kenkuada.
Namunganay daytoy gapu iti panangipakaammo ni Konsehal Jason Perera kabayatan ti maika-70 a regular session iti Sangguniang Panlungsod ditoy siudad.
Segun kenkuana, daytoy ket basar iti pannakisarsaritana kadagiti sumagmamano a pasiente ken staff ti hospital.
Pakairamanan kadagiti gatgatangenda ket kas koma ti alcohol, face mask, ken dadduma pay a kasapulan ti pasiente.
Mainaig iti daytoy, kinuna met ni Silva a daytoy ket epekto ti agtultuloy a panagado dagiti pasiente nga agturong iti nasao a balay pagagasan.
Inlawlawagna a no magatang ti nasao a medical supplies ket otomatiko a maikissay iti bayadan ti pasiente.
Impettengna nga adda ti ordinansa nga inpaulogna iti cashier ti ospital tapno ammo ti cashier a kasapulan a maikissay ti balor ti medical supply a ginatang ti pasiente manipud iti bill daytoy.
Innayonna a no ma-discharge ti pasiente ket otomatiko ti pannakakissay daytoy.
