Kinumpirmaran ni Mr. Isidro Madamba Jr., Bombo International News Correspondent iti California, USA, a karaman kadagiti 548 a nakaibalud iti estado ti California a naipababa ti sentensia manipud death penalty a nagbalin a life imprisonment iti California ket 2 a Pilipino.
Daytoy ket adda pakainaiganna ti ordinansa a ‘Moratorium on execution’ ni Governor Gavin Newsom iti nadakamat nga estado.
Naamoan a dagiti nadakamat a Pilipino ket addaan da ti kaso a ‘murder’ no sadinno ti rason no apay nasentensiaan dagitoy iti death penalty.
Nupay kasta, inbatad ni Mr. Madamba a ti pannakabaliw ti sentensia dagiti nakaibalud ket gungguna para kadagiti akusado kabayatan a nasakit daytoy para kadagii biktima gapu ta ti kiddawda ket hustisia.
Kabayatanna, segun ken ni Mr. Madamba, adda posibilidadna a maipaayan dagiti sumarsaruno a maibalud ti gundaway gapu iti daytoy ngem inpettengna a saan amin ket maipaayan ti commutation plan.
