Naiget ti panagmonitor ti Business Permit and Licensing Office ken ti City Health Office kadagiti paglakoan ti danom wenno water stations ditoy ciudad ti Laoag.
Segun kenni Atty. Charito Malicad, ti mangidadaulo iti Business Permit and Licensing Office ditoy siudad, adon dagiti naikkan da iti noticed gapu iti saan da a panag-comply kadagiti alagaden ti sanidad iti City Health Office.
Inbatad na nga adda dagiti a naikkan iti permit ngem saanda met a naisumitir dagiti kasapulan a dokumento iti City Health Office.
Inlawlawag na a no saan da a maisumitir dagiti kasapulan a dokumento iti naikeddeng nga aldaw a nailanad iti notice da ket isu metten ti panangpaserra da iti negosyo.
Inkalintegan ni Atty. Malicad a ti ar-aramiden da ket saan a maibilang kas anti-bussiness wenno anti-poor no di ket anti-illegality tapno maipasingked ti kinatalged dagiti in-inumen a danom ditoy siudad ti Laoag.
Innayon na a tapno maliklikan iti possible a pannakairisgo iti salun-at ti maysa nga indibidual ket masapol a dumalan iti usto a proseso iti panagnegosio.
