LAOAG CITY – Kinarit ni Vice Mayor Rey Carlos Fariñas ni ABC President Rbee Ablan nga umuna a mangipasa iti annual budget dagiti barangay ditoy siudad ti Laoag, tapno agbalin a pagwadan dagiti dadduma pay a barangay.
Inbatad ti bise mayor a nasayaat no umuna a makaipasa ti Laoag iti Annual Barangay Budget, tapno maipakita daytoy a pagwadan kadagiti sabali pay a lugar.
Segun kenkuana, iti panagbalin na a dati a barangay chairman, kasapulan a maipasa dagiti Annual Barangay Budget iti bolan ti Oktubre wenno Nobyembre.
Mainaig iti daytoy, kuna met ni ABC President Rbee Ablan a nakasagana dagiti barangay a mangipasa iti bukod da nga annual budget.
Nupay kasta, inlawlawagna nga adda ti panagbalbaliw ti template a maus-usar ken ti baro a pagalagadan nga isu ti rason iti pannakaladaw da nga agipasa iti nasao a budget.
Immuna iti daytoy, naaprubaran ti agarop P1.6 bilyon nga Annual Budget ditoy ciudad ti Laoag para iti 2027 kalpasan ti sumagmamano nga aldaw a budget deliberations.
