LAOAG CITY – Agtultuloy ti panangipaay ti opisina ni 1st District Congressman Sandro Marcos dagiti tulong babaen kadagiti programa ti nagduduma nga ahensia ti gobierno.
Segun kenkuana, saanna nga ipalubos nga awan ti maawat a tulong dagiti tunggal residente aglalo kadagiti kangrunaan nga agkasapulan.
Daytoy ket gapu kadagiti mangbabbabalaw kenkuana no apay a dakkel unay ti pondo iti distritona.
Kinunana a bassit pay daytoy no ikumparar iti husto a balor ti kasapulan dagiti umili.
Segun kenkuana, nabayag a saan a naikikkan ti importansia ti Ilocos Norte, ket itan a Presidente ti amanan a ni Presidente Ferdinand Marcos Jr. ket amin a kasapulan dagiti umili ket ipaayda.
Innayonna, a saanna nga ikankano dagiti aniaman a panangis-isyuda kenkuana gaputa aramidenna ti amin para kadagiti kakailian.
