Saan pay a masinunuo ti pakabuklan ti balor dagiti nadadael iti pannakauram ti maysa a balay iti Barangay Lacub iti siudad ti Batac.
Daytoy ti inbatad ni Senior Fire Officer 1 Bernalito Yago iti Bureau of Fire Protection iti siudad ti Batac.
Kuna na a nagresponde da a dagus apaman a naawat da ti report iti oras ti alas-9:38 ti rabii mainaig iti napasamak nga uram, ken iti oras ti alas-9:43 iti dayta metlaeng a rabii ket indeklarar dan ti fire out.
Inrakurak ni Yago a ti pagsayaatan na ket awan ti nadangrang kadagiti walo a kameng ti pamilya nga agnanaed iti nasao a pagtaengan.
Mainaig iti daytoy, inbatad ni Yago a basar iti pannakisarsarita da iti pamilya ket possible a ti nabaybay-an da a nakasindi a kandela ti nangrugyan ti uram kalpasan a saanda a naiddep sakbay a rimuar da.
Naamoan a ti balay ket kukua ti agnagan ti Norma Chua ngem banbantayan laeng ti nasao a pamilya.
