LAOAG CITY – Inpakaammo ti Southern Police District (SPD) ti panangipilana ti kaso kontra kadagiti naarestar a nasurok 200 nga indibidual gapu iti panangiwayatda ti iligal a tignay protesta kabayatan ti ASEAN Summit.
Segun ken ni Southern Police District Director Police BGeneral Rodel Pastor, naarestar dagiti nasao nga indibidual iti Sucat People’s Park iti Muntinlupa City kabayatan ti panagrugi ti ASEAN Summit.
Napasamak ti komosion kalpasan ti saan a pannakikooperar dagiti nasao nga indibidual kadagiti otoridad para iti natalged a tignay protesta.
Mainaig iti daytoy, kinuna ni Pastor a ti pannakapasamak ti panaggiginnuyodan dagiti protesters ti rason ti panangarestarda kadagiti sumagmamano kadakuada.
Inlawlawagna nga araramidenda laeng ti trabahoda a pagtalinaeden ti nalinak ken naurnos a pannakaisayangkat ti ASEAN Summit.
Immunan a nakikoordinar dagiti otoridad iti nasao a grupo sakbay pay ti panagrugi ti ASEAN Summit ngem nagkedked dagitoy a tungpalen ti kiniddaw dagiti otoridad, no sadinno intuloyda latta ti nangiwayat ti tignay protesta
Kabayatanna, dagiti naarestar nga indibidual ket temporario a naikabil iti National Capital Region Police headquarters iti Camp Bagong Diwa iti siudad ti Taguig.
Daytoy ket gapu iti panangkondenar ti grupo iti implementasion ti Pax Silica Initiative ti Luzon Economic Corridor iti Pilipinas.
Malaksid iti Pax Silica, karaman pay iti konkonderan ti grupo ti panagbisita ni United States President Donald Trump ditoy Pilipinas para iti pannakipasetna iti 49th ASEAN Summit.
