LAOAG CITY – Ginutigot dagiti eksperto iti salun-at iti publiko ti saandan a panaguray ti sintomas sakbay dagitoy nga agpakonsultar iti doktor.

Daytoy ket gaputa ti sakit a diabetes ken hypertension ket in-inot ken saan a madmadlaw a mangdaddadael iti salun-at ti maysa a tao.

Mainaig iti daytoy, kinuna met ti maysa nga eksperto a masapol ti maysa nga indibidual ti agpakonsultar iti doktor uray awan pay ti marikriknana a sakit iti bagina.

Mainaig iti daytoy, basar iti Philippine Statistics Authority (PSA) a ti diabetes mellitus ken ti hypertensive disease ket ti maika-lima ken maika-innem a rason a pakatkatayan dagiti tattao ditoy pagilian.

Dayta ket basar iti rekord ti ahensia manipud iti bolan ti Enero agingga Marso iti daytoy a tawen, no sadinno nairekord ti 6,292 ken 6,038 a pannakatay manipud kadagiti nadakamat a sakit.

Gapu iti daytoy, masapol nga insigida a maamoan dagitoy a sakit tapno maipaayan ti maysa a pasiente ti nasapa a pannakataming tapno maliklikan ti tsansa ti pannakatay gapu iti daytoy a sakit.