Natakawan ti sumagmamano nga indibdual a nagturong iti Floral Garden iti Barangay 1, San Lorenzo ditoy ciudad ti Laoag.

Segun iti maysa kadagiti nagbalin a biktima ti panagtakaw a ni Mrs. Marie Cabrales iti Brgy. 2 ditoy ciudad ti Laoag, nagturong da iti Floral Garden tapno bisitaen ti lola na idi Nobyembre 13, ngem idi nakaawid dan ket nakita ti asawa na a natukkol ti visor ti lugan da.

Kuna na nga inpagarop da nga adda laeng ti nangkursunada a nangaramid iti daytoy isut gapuna a saanda nga inkaskaso.

Nupay kasta, inyistorya ni Cabrellas nga idi napan iti trabaho na ket naduktalan na a ti coin purse na ket mapukpukaw ken idi kitaen na ti maysa pay a pitaka na ket awanen ti kargana a kwarta.

Inpakaammo ni Cabrellas nga umabot iti 22 ribo a pisos ken 80 a dolyar ti napukaw a kwartana, ngem awan met ti napukaw kadagiti gadgets da.

Mainaig iti daytoy, iniyistorya met ni Mr. Richard Collado a residente met laeng iti Barangay 2 ditoy ciudad ti Laoag ti pannakadadael ti lugan na ken ti dua pay a papagayam na iti panagturong da iti Floral Garden tapno makiminatay iti ina ti katrabahoan da.

Inpakaammo na nga idi mapan koma alaen ti pagayam na ti pawit iti lugan na ket ditoy a nakita da nga adda ti agkutkuti iti uneg ken nakita na nga adda ti tao a nakaiggem ti bag a nagtapwak manipod iti akin-likud a tawa.

Kuna na a saan a nakapaggunay a dagus ti pagayam na gapu iti pannakakigtot na ngem idi nalagip na nga adda ti bagna iti uneg ti lugan nga ayan ti ipad ken dakkel a kantidad ket nagpatulong kadagiti tattao tapno sabaten ti suspek.

Iti baet nga adda met ti nakapiddawil iti suspek a maysa nga ubing maibasar iti pammagina, kuna ni Collado a nakataray metlaeng ti suspek, ken madlaw a narwam ken nasaganaan a naimbag ti suspek ti panagaramid na ti krimen gapu ta daytoy ket nakaabungot ken naka-jacket.

Innayon na nga iti pananginspeksyon da ti uneg ti lugan ket nakita da metlaeng ti bag ti pagayam na a naglaon ti dakkel a kantidad ken ipad, ngem idi kitaen na ti mismo a pitaka na ket awanen ti nasurok a dua ribo a pisos ken ti ampao nga adda ti karga na a $20.

Inpaganetget ni Collado a ti laengen pagyamanan na ket saan a napukaw dagiti Identification Cards, ATM cards ken lisensya na gapu ta narigat ti ag-secure kadagitoy.

Kuna ni Collado nga adda pay ti dua a pada da metlaeng a napan nakiminatay ti nadadael ken natakawan ti lugan na no sadinno a ti maysa ket naitaray ti 2,500 a kwarta na.

Kabayatanna, binalakadan met ni Collado ti publiko a no adda ti pagturturungan ket nasaysayaat no itugot dagiti napapateg a gamit ken kwarta, ken saan a basta agibati iti uneg ti lugan.

Naamoan nga awan ti nakaistolar a Closed Circuit Television iti lugar.