LAOAG CITY – Kiniddaw ni Laoag City Vice Mayor Rey Carlos Fariñas ti nasayaat a pannakaipatungpal ti School Safety Ordinance ditoy suidad ti Laoag.

Daytoy ket kalpasan ti pannakaarestar dagiti tallo a menor de dad iti siudad ti Batac a maipagarup a nagplano ti mass shooting iti maysa a pagadalan.

Segun ken ni Vice Mayor Fariñas, naamoanna ti panangisayangkat ti PNP-Batac, babaen iti tulong ti National Bureau of Investigation (NBI), ti entrapment operation a nangitunda iti pannakaarestar dagiti tallo a menor de dad.

Gapu iti daytoy, kiniddaw ni Vice Mayor Fariñas ti koordinasion iti opisina ni Mayor Alcid tapno masigurado a maipatungpal a nasayaat ti School Safety Ordinance ti Laoag.

Inlawlawagna a naglaon ti ordinansa kadagiti preventive ken intervention measures a mabalin a makatulong iti panangliklik kadagiti kakastoy nga insidente.

Kabayatanna, nagpalagip ni Fariñas a rumbeng a maamiris dagiti kasapulan ken kasasaad dagiti estudiante tapno maipatungpal dagiti umno a pananglapped ken interbension para iti salun-at ken seguridad dagiti agad-adal.