Bimmaba iti $98 billion ti gross international reserves (GIR) ti pagilian iti panagleppas ti Oktubre, kabayatan a nakairekord ti $1.5 billion a deficit ti overall balance of payments (BOP) ti pagilian iti nadakamat a bulan, basar iti Bangko Sentral ng Pilipinas (BSP) idi kalman, Nobiembre 20.
Daytoy a panagbaba ti foreign reserves iti net foreign exchange operations ti BSP ket adda pakainaigan na ti panagbaba ti gatad ti balitok iti world market ken net foreign currency withdrawals ti nasional a gobierno para iti panagbayad ti external debt wenno utang iti ruar ti pagilian ken dadduma pay a pangkasapulan iti pondo.
Kabayatan ti panagbaba, inpasigurado ti central bank nga agtalinaed nga umdas ti reserba tapno masungbatan ti pangkasapulan ti pagilian, mabayadan dagiti obligasion nga utang iti ruar ti pagilian ken agserbi a salaknib kontra kadagiti sangalubongan a panagdayyeg ti ekonomia.
Katukad ti nadakamat a reserba ti 6.1 a bulan a gatad ti importasion dagiti negosio ken panagbayad kadagiti serbisio ken primary income ken kabaelan a punnuan ti sumurok-kumurang 3.2 a daras ti short-term external debt ti pagilian basar iti residual maturity.
Nupay kasta, gapu iti $1.5 a billion balance of payments (BOP) deficit idi Oktubre, dimmakkel iti $10.6 billion ti pakabuklan a kinakurang iti umuna a 10 a bulan ti 2026 a nangatngato ngem iti $4.6 billion a deficit iti kapada a panawen idi napalabas a tawen.
Inlawlawag ti Bangko Sentral ng Pilipinas (BSP), a sumarsarming ti year-to-date deficit iti agtultuloy a kinakurang ti panagnegosio dagiti produkto ken net outflows manipud iti foreign portfolio investments, a sangkabasssit a napunnuan ti agtultuloy a panagserrek ti remittances manipud kadagiti overseas Filipino, ganganaet a pautang ti gobierno, trade in services ken foreign direct investments.












