LAOAG CITY – Inbatad ni PMaj Antonio Marzan Jr., ti pannakangiwat ti Ilocos Norte Police Provincial Office (INPPO), a nirugyanan dan ti pananggutigot kadagiti pasdek negosio iti probinsia nga agisumitir dan ti kopia ti business permit ken sertipikasyon da a mangpaneknek nga accredited wenno adda pammulobs na nga aglako kadagiti paputok.

Segun kenkuana, iti dandani a pannakaselebrar ti paskua ken baro a tawen ket nangrugi da nga agawat kadagiti pasdek negosio iti business permit ken sertipikasyon da a pammaneknek a dagitoy ket lehitimo ken sumursurot ti pagannurotan bayat ti panaglakoda kadagiti paputok.

Inpetteng na pay a naiget ti panangipawil da ti panaglako dagiti paputok babaen ti online transactions kas ti social media ken sabali pay a wagas iti online ken dagiti awanan ti naan-anay a permit da nga aglako iti paputok.

Iti agdama, inpakaammo na nga awan pay ti nairekord da a naglabsing kadagiti pagannurotan mainaig iti panaglako ti paputok.

Kabayatanna, inbatad ni PMaj. Marzan nga aktibo ken agtultuloy ti panangisayangkat ti Ilocos Norte Police Provincial Office (INPPO) iti programa da nga Oplan Bandilio no sadinno agturong da kadagiti paspasdek nga ado iti tattao na kas ti merkado publiko, dadakkel a mall, terminal ti pampubliko a lugan, ken dadduma pay.

Nupay kasta, nagpalagip daytoy kadagiti indibidual mainaig kadagiti pagannurotan ken no kasano a maliklikan ti agbalin a biktima ti pick pocketing wenno ti takaw kabayatan ti panagturongda kadagiti lugar nga adu ti tao na.