LAOAG CITY – Dimmalan iti panagsanay dagiti opisial manipud 27 a barangay ditoy siudad ti Laoag para iti epektibo a panagbukel kadagiti ordinansa ken resolusion.

Segun ken ni Liga ng mga Barangay President Rbee Ablan, daytoy nga aktibidad ket wagas iti panagpapigsa iti kabaelan dagiti barangay officials iti panagaramid ti linteg a pagsayaatan dagiti sakupen da a barangay.

Inbatad na a ti nadakamat a panagsanay ket nagbinnuligan iti Liga ng mga Barangay – Laoag ken Department of the Interior and Local Government (DILG) – Laoag.

Inpakaamo na babaen iti panagsanay ket natratar ti umno a porma, konteksto ken proseso iti panangbukel kadagiti barangay ordinance ken resolution.

Mainaig iti daytoy, maysa kadagiti nagbalin a resource speaker ket ni Local Government Operations Officer VI (LGOO VI) John Anthony Bareng a nangipaay ti lecture pakaseknan iti panagaramid ti regulatory ordinances ken barangay resolutions, partikular iti formulation, structure ken substance ti legislative measures wenno gakat nga idasar da iti uneg ti barangay.

Malaksid iti lecture, naisayangkat pay ti Hands-on Drafting Workshop no sadinno ditoy nga aktwal a nagaramid kadagiti draft ordinance ken resolution dagiti partisipante, ken napasarunoan ti pannakatingiting wenno pannakakritikar tapno mapapintas dagiti outputs dagiti opisial dagiti barangay.

Kabayatanna, indauloan met ni Local Government Operations Officer VI (LGOO VI) Charis Garma, ti mangidadaulo ti Department of the Interior and Local Government (DILG) – Laoag, ti pannakaisayangkat ti action planning session no sadinno natratar kadagiti barangay officials iti kontreto nga addang tapno magun-od ken maaramat kadagiti barangay dagiti nasursuro da kabayatan iti panagsanay.

Nupay kasta, patien ni Liga ng mga Barangay President Ablan a babaen iti nadakamat a panagsanay ket manamana nga ad-adda a mapapintas ken mapagbalin a legal ken epektibo dagiti ordinansa ken resolution a mabukel dagiti barangay officials tapno maliklikan ti aberia a mapasamak.

Maipalagip nga iti laeng kallabes iti Sangguniang Panlungsod iti siudad ti Laoag, ket adda dagiti natratar nga ordinansa ken resolution nga saan a naideklarar a valid iti konseho gapu ti saan nga umno a nakapalaon kadagiti gakat.

Immununan nga inkiddaw ni Presiding Officer Vice Mayor Rey Carlos Fariñas ken Liga ng mga Barangay Rbee Ablan a mangisayangkat da ti training kadagiti opisial ti barangay tapno maliklikan ti pannakadeklarar kas invalid dagiti gakat.