LAOAG CITY – Pinatibker ti Office of the Ombudsman ti innem a bulan a suspension nga awanan ti sueldo kontra ken ni Dalaguete, Cebu Mayor Ronald Allan G. Cesante ken lima pay nga opisial gapu iti nakaro a panangbaybay-a iti akem wenno Gross Neglect of Duty.
Daytoy ket adda pakainaigan na iti iregularidad iti panangipatakder ti municipal warehouse iti maysa a pribado a sanikua.
Iti inparuk-at a Consolidated Order, inbasura ti Ombudsman ti motion for reconsideration dagiti opisial ken pinagtalinaed ti immuna a desision idi Agosto 29, 2025.
Karaman kadagiti sinuspenso ket da Municipal Assessor Edmund M. Centeno, Budget Officer Brenda S. Vergara ken tallo pay a miembro ti Bids and Awards Committee.
Segun iti Ombudsman, saan nga umdas ti permit nga inusar dagiti opisial tapno palubusan ti munisipalidad a serken ken pasdekan ti warehouse iti nadakamat a lote.
Napaay pay dagitoy a siguradoen no adda legal nga otoridad a mangibagbagi dagiti agtagikua ti lote a mangipaay ti pammalubos.
Inpaganetget ti ahensia a rumbeng a siguradoen umuna dagiti opisial ti legalidad ken panagkompleto dagiti dokumento sakbay nga ituloy ti procurement ken konstraksion ti proyekto.






