LAOAG CITY – Linawlawagan ni ABC President Nelson Gooc iti ili ti Paoay ti reklamo nga indanun ditoy Bombo Radyo Laoag dagiti sumagmamano a partidor iti nasao nga ili.
Daytoy ket mainaig iti maipagarop a saan da a panangipakaammo kadagiti nasao a partidor nga adda dagiti requirement a kasapulan nga ipakita da iti kada munisipyo a pagikabilan da kadagiti maparti a baboy.
Inbaga ni Gooc nga iti laeng aldaw idi kalman a naawat da ti pammilin a masapol nga adda ti sertipikasyon ti kapitan nga ipakita dagiti partidor iti kada pagpartian ti pagturungan da a munisipyo.
Naiparuk-at ti nasao a pammilin kalpasan a kinumpirmaran ni Doctor Loida Valenzuela, ti Provincial Veterinarian ditoy probinsya nga addan ti kaso nga ASF iti ili ti Solsona.
Inbatad ni Gooc a gagem ti maisyu a sertipikasyon ti kapitan iti paggapwan ti maparti a baboy ket tapno masigurado a saanen a maiwaras ti virus.
Kabayatanna, inbaga ni Gooc a kitaen da pay a naimbag no mabalin da ti agsingir iti panagala ti nasao a sertipikasyon.
