LAOAG CITY – Inbabawin ni ABC President Renato Garcia iti Barangay Santiago iti ili ti Solsona ti pannakaideklarar ni Konsehal Marvin Pascua kas persona non grata iti barangay da.
Daytoy ket kalpasan a nagpadespensar ni Pascua kadakuada nga opisyal iti nadakamat a barangay kadagiti inib-ibbatan na a sarita kontra kadakuada a namonganay iti isyu seknan iti makwes-kwestyunaran a panangabak ni Miss Princess Jerinne Aquino kas Miss Solsona 2025.
Maipalagip nga adda dagiti mangkwes-kwestyunar iti panangabak ni Aquino gapu ta ipetpetteng da a saan a residente daytoy iti Barangay Santiago.
Iti naangay a sesyon iti konseho iti ili ti Solsona ket in-mosyon ni Garcia a saanen a matratar ti isyu ken saanen a mapaayaban dagiti pada na nga opisyal ti barangay.
Naamoan a napan met nagatendar ni Miss Aquino iti sesyon ngem kinunana a saanna a mailadawan ti marikrikna na iti panangabak na gapu iti alegasyon a saan a residente iti ili ti Solsona.
Gapu iti daytoy, ibilangen ti presiding officer iti konseho iti ili ti Solsona a naurnusen ti nasao nga isyu.
