LAOAG CITY – Inlawlawag ti maysa a Private Lawyer a ni Atty. Elreneo Kidd Castro a ti absolute pardon ket maysa a gundaway tapno mawaya-wayaan ti maysa a nakunbiktaran gapu iti pammalubos ti maysa nga adda iti executive seat.
Kinunana a tapno maipaayan ti maysa nga indibidual ti absolute pardon ket masapol a guilty ti maysa nga indibidual manipud iti pammabasol a sinangona.
Inbatadna a ti kayatna a saoen ti absolute pardon ket maysa a pammakawan wenno ti pannakaawan ti criminal liability-na nga awan ti aniaman a kondisionna.
Segun kenkuana, naidumduma ti kaso ni Ms. Mary Jane Veloso a nawaya-wayaan gapu iti absolute pardon nga impaay ni Presidente Ferdinand Bongbong Marcos Jr. gaputa nakonbiktaran daytoy iti ruar ti pagilian.
Nupay kasta, gapu iti napasamak a diplomatic ken legal development ti Pilipinas ken Indonesia, no sadinno a kinissayan ti Indonesia ti sentensiana ken ni Veloso manipud iti manipud iti death sentence ket nagbalin a daytoy a life imprisonment ken nai-transfer pay daytoy iti kustodiar ti Pilipinas.
Gapu iti daytoy, kalpasan ti adu nga evaluation nga insayangkat ti national government ken ni Veloso, naamoan a kwalipikado daytoy a maipaayan ti absolute pardon nga insigida met a pinirmaan ni Presidente Marcos idi Setiembre 24 ken kinumpirmaranna daytoy iti publiko idi Setiembre 25.
Kabayatanna, inpetteng ni Atty. Castro a ti maysa nga indibidual a naipaayan ti absolute pardon ket saanna a kayat a saoen nga awan ti inaramidna a panaglabsing iti linteg gapu ta ti requirement tapno maipaayan ti kastoy a banag ket masapol a convicted daytoy manipud iti pammabasol a sinangona.
