LAOAG CITY – Inbatad ni ACT teachers partylist representative France Castro a saan nga umanong ti grupo da iti panangsertipikar kas urgent ni Presidente Ferdinand Marcos Jr. ti Maharlika Investment Fund.
Segun ken ni Castro, saan nga urgent ti gakat nu daytoy ket saan nga agkasapulan ti national security wenno adda ti emerhensya ken didigra.
Inbatad na a gapu iti daytoy, adda ti abuse of authority a napasamak.
Kuna na a ti kangrunaan a rason a saan nga umanong iti nasao a gakat ket saan met nga emerhensya a kasapulan ti pagilian ken ad-ado ti nasken a matratar a problema ti Pilipinas.
Inbunannag na a nu pay naikkat ti GSIS ken SSS a paggapoan ti pondo iti nasao nag investment ket adda latta ti pannakusar ti pondo ti publiko gapu ta aggapo iti sentral bank, landbank ken development bank of the Philippines pakairamanan ti PAGCOR.
Inbatad na a dita a mabalin a maapektaran dagiti sektor a matultulungan dagiti pondo nga aggapo kadagiti nadakamay a bangko ken corporasyon.
Immuna iti daytoy, ti Singapore ken dadduma pay a pagilian a nagsarmingan dagiti agpanpanday linteg a nangilunglong iti gakat ket saan a kapada ti estado ti Pilipinas agsipod ta awan ti soverign fund ti pagilian.
Kabayatanna, kuna ni Castro a ti kaamak da ket nu dagus a maipasa iti senado ti gakat agsipod da arig nga amin nga adda iti turay ket kaalyado ti administrasyon.
Inpetteng na a nu pay adda ti panagamak, mangnamnama a maadal a naimbag daytoy sakbay a maibbatan ti pinal a desisyon.
