LAOAG CITY – Inalay-ayan ti Philippine National Police (PNP) iti publiko nga awan ti maawat nga special treatment ni Senador Ronald “Bato” dela Rosa mainaig iti warrant of arrest a maikonkonektar kenkuana.
Inbatad ni Philippine National Police Chief General Jose Melencio Nartatez Jr. nga agtalinaed a maiyataday iti linteg ken pammilin ti organisasion ti amin ti tignay ti pulisia aniaman ti ranggo wenno posision ti maysa nga indibidual.
Inaramid ti Philippine National Police ti rakurak kagiddan dagiti saludsod ti publiko no agbalin a naiget ti panangipatungpal ti linteg kontra iti senador gapu iti dati a takder kas hepe ti nailian a pulisia ken nabayagen a koneksion iti organisasion.
Kunana nga inbilinna ti amin nga yunit ti pulisia a naiget a suroten ti standard operating procedures iti aniaman nga operasion nga adda ti pakainaiganna ken ni Dela Rosa.
Ni Dela Rosa ket sumangsango mainaig iti warrant of arrest manipud iti International Criminal Court (ICC).
Nangiparuk-at ni Nartatez ti pammilin kadagiti police commander a liklikan ti aniaman a preferential treatment ken saan nga otorisado a panangibutaktak ti impormasion a mabalin a makaapektar kadagiti operasion ti pulisia.
