LAOAG CITY – Nakalukat ti Philippine National Police (PNP) iti posible nga imbestigasion mainaig iti maipagarup a police violence wenno kinaranggas ti pulisia ken ti saan a nainkalintegan a panangarestar kadagiti nangiwayat ti tignay protesta iti kangitingitan ti State of the Nation Address (SONA) ni Presidente Ferdinand Marcos Jr. idi Hulio 27.
Inrakurak daytoy ti nailian a pulisia kagiddan dagiti damag nga adda ti sumagmamano nga human rights ken people’s organization nga agpanpanawagan iti Commission on Human Rights (CHR) a mangiwayat ti independent investigation mainaig iti maipagarup a panangabuso ti pulisia ken panangarestar iti 51 a raliyista.
Inbatad ni Philippine National Police Chief General Jose Melencio Nartatez Jr. a kanayon a nakalukat ti nailian a pulisia iti aniaman nga imbestigasion tapno mapagsungbat ti nasken a mapagsungbat no bilang mapaneknekan.
Kabayatanna, inpetteng latta ti pulisia iti nagbalin a panangarestarda kadagiti nasao nga indibidual idi State of the Nation Address gapu ta ti sumagmamano kadagitoy ket dimmalan iti inquest proceedings ken naipasangon iti husto a proseso ti linteg.
