LAOAG CITY – Bimmaba ti 24.6% ti panaglako ti lugan ditoy Pilipinas idi Abril, basar iti report ti Chamber of Automotive Manufacturers of the Philippines Inc. (CAMPI) ken Truck Manufacturers Association (TMA).
Umabot laeng iti 27,225 units ti nailako a lugan manipud iti 36,104 units idi Marso.
Segun iti report, maysa kadagiti kangrunaan a makaigapu ti panagbaba ket ti panagngato ti presio ti langis a gubuay iti tension iti Middle East a nakaapektar iti desision dagiti gumatang ti lugan.
Inbatad ni Chamber of Automotive Manufacturers of the Philippines Inc. President Jose Maria Atienza nga agbalbalin a naannad dagiti customer iti panaggatang ti lugan gapu iti nangato a gastos iti gasolina.
Kaadoan kadagiti mailaklako ket manipud kadagiti commercial vehicles nga umabot iti 79.51% ti total sales idinto ti passenger cars ket umabot iti 20.49% laeng.
Agtultuloy nga umun-una ti Toyota Motor Philippines iti market share nga addaan ti sumurok kagudua ti pakabuklan a lako.
