LAOAG CITY – Inpasigurado ni Acting Senate President ken Senate President Pro-tempore Sherwin Gatchalian a naiget a suroten ti Konstitusion para iti panangiyetnag ti desision ti Senate Impeachment Court ken ni Vice President Sara Duterte.
Daytoy ti inpetteng ni Gatchalian iti baet ti ballaag ni Senador Alan Peter Cayetano a posible nga ikabil iti panagbubutos iti impeachment ken charter change ti inaramid ti Gatchalian bloc a panagbalbaliw iti bilang dagiti Senador a makabukel ti quroum iti plenario.
Dinakamat ni Gatchalian ti panangsurot iti article 11 section 3 paragraph 6 ti 1987 Constitution no sadinno a mangibagbaga nga awan ti makumbiktaran iti impeachment trial no saan a makagun-od ti 2/3 a butos iti bilang a 24 a Senador wenno katukad ti 16 a butos.
Inbatad ni Gatchalian a surotenda ti naikeddeng iti 1987 Constitution a 16 a butos kas conviction treshold wenno butos para iti panangiyetnag ti desision a guilty uray mano pay a Senador ti agatendar wenno makipaset iti impeachment trial.
Kabayatanna, kinumpirmaran ti Acting Senate President a mangiyisyu daytoy ti pammilin tapno isayangkat inton Hunio 18 ti pre trial conference mainaig iti impeachment trial ni Vice President Sara Duterte.
Inpaayan ti House prosecution panel ken ti kampo ni Vice President Sara tapno agisubmitir ti pre-trial briefs agingga inton Hunio 15 ken naikeddeng ti trial proper inton Hulio 6.
