LAOAG CITY – Namnamaen ti iyaadu dagiti trabaho ken gundaway iti panawen ti paskua.
Daytoy ti inwaragawag ti National Economic and Development Authority (NEDA) kalpasan ti kaudian a survey ti labour force para iti bulan ti Agosto.
Maibasar iti report ti Philippine Statistics Authority (PSA), bimmaba iti 4 a porsiento ti unemployment rate wenno bilang dagiti awanan panggedan idi Agosto manipud iti 4.7% a nairekord idi Hulio.
Segun iti PSA, immadu met ti bilang dagiti addaan iti trabaho wenno negosio iti 96% idi Agosto wenno katukag ti 49.15 million a Pilipino.
Segun kenni National Economic and Development Authority Secretary Arsenio Balisacan, iti rekord ti uppat a tawen a nababa nga inflation rate idi Setiembre, agtalek a nasayaat met ti panawen ti paskua para kadagiti mangmangged a Pilipino.
Innayon ti sekretario a ti umdas a panagpuonan iti sektor ti panagtrabaho kasta met kadagiti dadduma a prioridad a sektor ti tulbek tapno matungpal ti naan-anay a panagbalbaliw a nailanad iti Philippine Development Plan 2023-2028.
