LAOAG CITY – Adda ti innem a lugar ditoy Ilocos Norte a maibilang nga Area of Concern para iti National ken Local Election iti tawen 2022.
Daytoy ti inbatad ni Police Lt. Col. Paul Benidict Parado, ti mangidadaulo ti Provincial Operation Management Unit ti INPPO.
Karaman ditoy ti ciudad ti Laoag, dagiti ili ti Pagudpud, Solsona, Badoc, Sarrat ken ti Bacarra.
Nupay kasta, kuna ni Parado a saan pay a pinal daytoy gapo ta ti nagbasaran da pay laeng ket ti sitwasyon idi napalabas nga eleksyon.
Inlawlawag na nga adda pay ti maiyuswat nga assessment partikular ti intelligence report nga isu ti pagibasaran da kadagiti kangrunaan a mabantayan iti eleksyon.
Kunana a ditoy pay ti pagibasaran da iti deployment strategy tapno natalna a maiyuswat ti eleksyon iti sumaruno a tawen.
Mainaig iti daytoy, kinumpirmaran ni Parado a saan a makaanay ti nasurok a sangaribo a PNP personnel tapno agbantay iti sibubukel a probinsya nangruna ket maibagbaga a dua a pulis ti agbantay iti kada polling precinct.
Gapo iti daytoy, kunana nga agkiddaw da ti augmentation manipud iti Regional Office nangruna ket masapol nga adda latta ti agbati iti kwerpo ti pulisya ken adda ti agresponde no bilang man adda ti madi a mapasamak.
Innayon na nga amin dagitoy ket maikonsiderar iti maiyuswat to manen a taripnong da iti Comelec intono sumaruno a bulan.
Kabayatanna, inpalagip manen ni Parado ti naiget a pannakaipatungpal ti Comelec Gun Ban ken nasken a dagiti otorisado nga agikot ti paltog ket iggem da latta ti dokumento dagitoy.
