LAOAG CITY – Adda ti poder ken pribilehiyo ti kongreso nga agdesisyon no kayat da a sukatan dagiti linteg a mangituding pannakaiyuswat iti eleksyon ditoy pagilyan.
Daytoy ti nagbalin a reaksyon ni Atty. Domingo Cayosa, ti dati a presidente ti Integrated Bar of the Philippines (IBP) mainaig iti naibaga ni Atty. Romulo Macalintal nga “abuse of power” ti panangitantan dagiti agpanpanday linteg iti Barangay ken SK elections.
Inpetteng na a ti barangay elections ket intuding ti linteg, saan a ti konstitusyon ken adda ti karbengan dagiti agpanpanday linteg a mangsukat iti daytoy.
Innayon na a saan a maibilang nga “abuse of discrepancy” ti addang dagiti maseknan nga agpanpanday linteg.
Kuna na pay a masapol a respetaren ti mandato a naipaay kadakuada babaen kadagiti umili.
