LAOAG CITY – Kinumpirmaran ni Dr. Loida Valenzuela, Provincial Veterinarian nga adda dagiti ili ditoy Ilocos Norte ti mabalinen nga agtaraken ti baboy.
Karaman kadagiti mabalin nga agtaraken ket ti ili ti Adams ken Pagudpud nga adda iti Yellow Catergory.
Segun kenni Valenzuela, maiyur-uray met ti kumpirmasyon no kaano a mabalin nga agtaraken ti baboy iti ili ti Dumalneg ken Pinili gapo ta awan ti laboratory recorded nga ASF positive.
Inlawlawag na nga iti met ili ti Banna, Piddig ken Bangui ket adda pay laeng iti red zone ngem addan ti naisubmitir a samples para iti testing.
Mainaig iti daytoy, kunana nga agtultuloy met ti surveillance nga iyus-uswat da ken iti kaudian a testing ket negatibo resulta dagiti naipadalan.
Kabayatanna, kunana a masapol a madalusan a nalaing wenno naan-anay a maikkat ti virus kadagiti naimpektaran a barangay sakbay a mapalubusan nga agtaraken.
Gutgutiguten na dagitoy nga agtultuloy nga ipatungpal ti panagdisinfect ken panagdalos kas karaman iti procedures.
