LAOAG CITY – Inpakaammo ni Ms. Antonette Bareng, mangidadaulo ti Business Permit and Liscensing Office ditoy siudad ti Laoag nga agdagup ti 90% ti nakapag-renew ti business permit-nan.
Segun kenkuana, ti makitkitana a rason no apay saan pay a makabayad dagiti dadduma ket gapu ta awan pay ti pagbayad dagitoy.
Inbatadna nga adda dagiti sumagmamano a negosio nga adda ti problemana iti health presentation-da ken dadduma pay.
Kunana a no laketdi makabayaddan ket insigida met a maisyuan dagitoy ti permit.
Inlawlawagna nga adda pay ti 210 a saan pay a nakabayad, 27 ti dumalan pay laeng iti beripikasion ken 144 ti nakaisaganan a maiendorsar idinto a 656 met dagiti saan pay a nakaala ti permit-da ngem nakabayaddan.
Innayonna a ti nadakamat a bilang ket karaman pay ditoy dagiti baro a pasdek negosio.
Maipalagip a nagngudo ti panagi-renew ti business permit idi Pebrero 28 no sadinno a namnamaen ti nadakamat nga ahensia a magun-odda ti sumurok innem a ribu a nakarehistro ita a tawen.
