LAOAG CITY – Ado a baboy ti naparti iti slaughter house ditoy ciudad ti Laoag kabayatan ti bisperas ti paskua.
Segun kenni Ms. Shanel Antonio, mangidadaulo ti slaughter house ditoy ciudad, umabot iti 176 a baboy, innem a baka ken dua a kalding ti naparti.
Inlawlawag na nga iti alas-onse idi rabii ket nangrugi ti panagparti kadagiti dingwen.
Inbatad na a dagiti baboy a naparti ket naggapo iti ili ti Vintar, Dingras, Paoay ken dadduma pay.
Kunana a ti pannakaiserrek ti baboy iti slaughter house ket nasurot ti proseso ken amin dagiti dokumento kas iti certificate manipud iti ili a naggapoan ti baboy.
Innayon na nga ita ket awan ti panagkurang ti suplay ti karne ti baboy iti merkado ditoy ciudad ti Laoag.
