LAOAG CITY – Naruay dagiti tattao a nagreklamo kalpasan a saan da a naakomodar iti papanda panangala koma ti tulong pinansyal nga ipaay ti Overseas Workers Welfare Administration (OWWA) iti centenial arena ditoy ciudad ti Laoag.
Segun iti maysa kadagiti mapan koma umawat ti tulong a ni Sheryl Dahilig iti ili ti Pinili, inbatad na nga arigna ad-ado da a saan a naakomodar iti centenial arena.
Inpetteng na a basar iti naipakaammo kadakuada ket naawanan ti pondo rason a dagiti saan pay a nakapirma ti porma ket alaen lattan dagiti maseknan ti nagan da, address ken ti kabagyan wenno kameng ti pamilya da nga adda iti ballasiw taaw.
Malaksid iti pondo, rumrumuar a saan a dagus a naipakaammo kadagiti benepisyaryo nga ita ti papanda panagawat ti tulong pinansyal no sadinno a makaawat ti tunggal maysa iti 3 ribo a pisos.
Nagkedked paylaeng iti nasao nga opisina a mangipaay ti komento na seknan iti daytoy a banag.
