LAOAG CITY – Kinumpirmaran ti Armed Forces of the Philippines (AFP) a mangipatungpalda ti adjustment iti aramidenda a Rotation and Resupply mission iti BRP Sierra Madre iti Ayungin Shoal iit West Philippine Sea (WPS).
Daytoy ket kalpasan ti insidente idi Hunio 17, 2024 no sadino nangipakita ti iligal ken agresibo a tignay ti China Coast Guard (CCG).
Segun ken ni Armed Forces of the Philippines Spokesperson Colonel Francel Margareth Padilla a maaddaan ti panagbalbaliw iti aramidenda nga addang tapno maliklikan ti kapada nga insidente.
Basar iti opisial, adda dagiti nakadasar contingency measures-da ken naigetda nga inadal ti Armed Forces of the Philippines dagiti aramiden tapno agbalin a naballigi ti Rotation and Resupply mission.
Naiget pay ti manarimaan a koordinasion ti Armed Forces of the Philippines iti Philippine Coast Guard ken Bureau of Fisheries and Aquatic Resources para iti agtultuloy a maritime patrols tapno maprotektaran dagiti Pilipino a mangngalap.
Immunan nga inrakurak ni Armed Forces of the Philippines Chief of Staff Gen. Romeo Brawner nga itultuloyda ti rotation and reprovision of supplies iti BRP Sierra Madre gapu ta adda dagiti personnel a naka-station iti nasao a lugar ken pakairamanan dagiti sumagmamano a features a sakupen iti Exclusive Economic Zone ti Pilipinas.
Inpaganetget ni Brawner ti Rotation and Resupply mission ket maysa a legal nga operasion nga isaysayangkat ti Pilipinas.
Nagkedked met ni Brawner nga idetalye no ania a wagas ti aramidenda tapno maidanon dagiti supplies iti BRP Sierra Madre.
Agtultuloy nga ipetpetteng ti Armed Forces of the Philippines a ti presensia ti China iti West Philippine Sea ket iligal.
