LAOAG CITY – Simmuko kadagiti otoridad dagiti agama a maipagarop a supporters ti New People’s Army (NPA) iti Sitio Tabbog, Brgy Caunayan iti ili ti Pagudpud.
Binigbig ni Pol. Lt. Col. Randy Baoit, ti pannakangiwat ti Ilocos Norte Police Provincial Office (INPPO) dagiti agama a simmuko nga isuda Alexander Pagdilao Sr, agtawen ti 60 ken ti anak na a ni Lisa Lagundino Pagdilao a.k.a. “Liza”, agtawen ti 53.
Segun ti report, rumrumuar nga idi 2000 a nangrugi a sinuportaran dagiti agama ti KLG-Southern Ilocos Sur (SIS), maysa kadagiti ka-aktiboan nga NPA units iti intero a Region 1.
Nupay kasta, babaen ti panagtitinnulong ti PNP-Pagudpud, PNP-Adams ken Delta Coy, 24th IB ken Philippine Army ket naallukoy da dagiti agama a sumuko laengen.
Iti isusuko dagiti agama ket inkabil da dagitoy iti Layaan Patrol Base Delta Company, 24th IB iti Brgy. Subec iti ili ti Pagudpud para iti tactical interrogation.
Maipalagip nga idi November 11, 2019 ket kinondenar ti gobierno lokal ti ili ti Pagudpud ti Communist Party of the Philippines – New People’s Army- National Democratic Front (CPP-NPA-NDF) ken indeklara da kas “Persona-Non-Grata” babaen ti Municipal Resolution No. 2019B-099 series of 2020.
Kabayatanna, kinumpirmaran ni Pol. Capt. Eduardo Santos iti PNP Pagudpud a karaman a simmuko ti anak dagiti maseknan.
Gapu iti daytoy, inbatad na a nakasagana ti lokal a gobierno ti Pagudpud para iti baro a panagbiag dagiti simmuko.
