LAOAG CITY – Inpasigurado ti National Food Authority (NFA) a dagiti laeng lehitimo a mannalon ti mabenepisiaran para iti maikeddeng a nangatngato ngem P30 iti kada kilo iti buying price ti irik tapno maliklikan ti posible a panagabuso dagiti traders.
Segun ken ni National Food Authority Administrator Larry Lacson, ti panagngato ti purchasing price ket sungbat ti agtultuloy a panagngato ti gastos ti produksion ken presio ti gasolina a makaapektar ti biruk dagiti mannalon.
Inbatadna a tapno masigurado a saan a manggundaway dagiti middlemen wenno trader ti sistema ket masapul a nakarehistro dagiti aglako iti Registry System for Basic Sectors in Agriculture (RSBSA) ti Department of Agriculture wenno adda sertipikasion manipud iti Municipal Agriculture Office a mangipakita nga isuda ket lehitimo a mannalon.
Malaksid iti daytoy, adda ti “farmer’s desk” kadagiti buying station a mabalin a mamonitor ti publiko ti panaggatang ti irik kas paset ti transparency ken citizen participation audit no sadinno a maipan met ti bulletin board ti nagan dagiti mannalon a naglako ti apit.
Kuna ti National Food Authority a gagemna a papigsaen ti buffer stock ti bagas iti pagilian kalpasan a nakagatang laeng ti nakurang a 1% ti target nga imbentario kadagiti napalabas a bulan gapu iti panagngato ti presio ti irik.
Innayon ti ahensia a ti ginatang nga irik ket saan nga insigida nga ilako ti merkado no diket maipenpen pay laeng kas reserba a mausar iti kalamidad, emerhensia ken suplay.
