LAOAG CITY – Inpakaammo ni Atty. Donato Balderas, Schools Division Superintendent ti Department of Education – Schools Division of Ilocos Norte nga agarup 15 a ribu a delegates para iti Palarong Pambansa 2025 ti nakasangpeten ditoy probinsia.
Daytoy ket maysa nga aldaw sakbay ti pormal a panaglukat ti nasao a naindaklan nga aktibidad.
Segun ken ni Atty. Balderas, malaksid iti nasao a bilang ket posible a dumanon pay ti agarup 20 agingga iti 22 a ribu dagiti amin a bimmisita ditoy probinsia gapu ta adda dagiti nagannak wenno kabagian dagiti atleta a simmurot para iti sports competition.
Inbatadna a nakasagana aminen a kasapulan ken awan met ti seryoso a problema a napasaranda.
Inlawlawagna a ni Presidente Ferdinand Marcos Jr. ti manamnama a kangrunaan a sangaili para iti opening ceremony ti Palarong Pambansa 2025.
Innayonna nga ibilangna daytoy a maysa kadagiti pakasaritaan ditoy probinsia gapu ta naisangsangayan ti panagbalin nga host ti maysa kadagiti kadakkelan a multi-sport event iti intero a pagilian a Pilipinas.
