LAOAG CITY – Natay ti agarup 20 nga indibidual gapu iti magnitude 6.3 a gingined idiay Afghanistan.
Basar kadagiti otoridad, mabalin a ngumato pay ti bilang dagiti biktima a pimmusay kabayatan iti agtultuloy a pannakaiwayat ti rescue operations.
Narikna ti gingined iti asideg ti Mazar-e-Sharif a maysa kadagiti kadakkelan a siudad iti nasao a pagilian nga adda ti 500 a ribu a tattao ti agnanaed ditoy.
Segun iti United States Geological Survey, ti magnitude 6.3 a gingined ket adda ti kauneg a 28 a kilometro ken naipan iti orange alert level gapu iti umad-adu a bilang dagiti natay.
Mainaig iti daytoy, inrakurak ti Taliban government health ministry nga adda ti sumurok 530 nga indibidual ti nasugatan no sadinno nga inpakaammo ni Haji Zaid, pannakangiwat ti Taliban iti Balkh province a naruay dagiti nasugatan iti Sholgara district, abagatan ti Mazar-e- Sharif.
Inbatadna a kaaduan kadagiti nasugatan nga indibidual ket natnag manipud kadagiti nangangato a pasdek.
Inlawlawagna a kaaduan kadagiti residente iti Mazar-e Sharif ket insigida a nagtaray iti kalsada apaman a narikna ti napigsa a gingined gapu iti panagamakda a marpuog dagiti pagtaenganda.
Naammoan a gapu iti kinapigsa ti gingined ket nangitunda daytoy iti panagpukaw ti serbisio ti kuryente idiay Afghanistan pakairamanan ti kabisera daytoy a Kabul City kalpasan a nadadael ti electricity lines manipud iti Uzbekistan ken Tajikistan a kadakkelan a suppliers ti kuryente ti Afghanistan.
Maipalagip a narikna manen ti magnitude 6.0 a gingined iti kabanbantayan a paset ti Afghanistan idi Agosto a nakatayan ti sumurok 1,100 a tattao.
